فضفضة مع أميرة عابدين

الدكتورة أميرة عابدين تكتب… مالك =ماذا حل بنفسك؟

واي واقع بتعمله سؤال ف الإجابة موجوده قبل ما بتسأل…
🔔 🥀فهو إيه الصعب والغريب في إنه لما تتسألي مالك؟ تقولي:
-أنا متضايقة شوية بس مش حاسة أني عاوزة اتكلم دلوقتي. أو
-والله مقريفة بس مش عارفة ليه؟ أو
-معلش أصل أنا PMS أو
-ماتشغلش بالك حبيبي أنا هفهم مالي وهاجي أحكيلك من نفسي.
👌متبوعة ب:
شكرًا إنك سألتني♥.

إيه المريب والمستحيل في انها لما تسألك مالك؟ فترد:
-أنا متضايق شوية بس مش عايز أحكي وأنا منفعل عشان ببقي سخيف. أو
-ماتقلقيش حبيبتي الموضوع مالوش علاقة بينا ولما أحس إني قادر أحكي معاكي هحكيلك. أو
-بصي أنا هدخل الكهف شوية وهطلع أقولك مالي .
👌متبوعة ب:
شكرًا إنك مهتمة حبيبتي💞.

😶🔔ليه لازم عشان احنا متضايقين نربك اللي قدامنا! ليه بدل ما نستفيد من اهتمامه عشان احنا أصلًا متضايقين ومحتاجين كل طاقته في إنه يساعدنا، نهدرها في إنه تطلع روحه وهو بيحاول يفهم احنا مالنا!

🔔ليه بدل ما نقوله احنا محتاجين طبطبتك🤗، نوصله رسالة إحنا مقموصين وإنت مقصر😶! وسؤالك بنقابله بتجهم وجحود، وأصل لو إنت مهتم كنت عرفت لوحدك!

🔔🙆بنت صاحبتي من فترة لما كانت تسألها مالك؟ كانت ترد:
U should know yourself مفروض تعرفي لوحدك

لأ دا الطبيعي ، لو جاوبتي كده تاني هسيبك تتفلقي، عايزة تحكي دلوقتي هسمعك، عاوزة تحكي بعد شوية أنا هستناكي، بس تقولي بكل وضوح:
مش عايزة اتكلم دلوقتي ياماما هحكيلك لما أقدر.
وفهمتها ده وبقت تعمل كده وساعتها مابتكررش السؤال، لكن بتحضنها وتقولها أنا بحبك.

♥♥ليا اتنين أصدقائي بيحبو بعض، لما هي بتزعل حتي لو هو السبب بتقوله: أنا زعلانة منك ومتوقعاك تراضيني و تحتويني.
تعبيرها إنها متوسمة فيه الخير بيخليه يعمل كل اللي يقدر عليه عشان يدلعها، أصلها وصلتله عن نفسه رسالة ايجابية.

ولو حبت تبقي مع نفسها بتعرفه قبلها بكل احترام:
أنا مش متضايقة منك إنت حبيبي بس محتاجة أبقي لوحدي، ممكن؟
ساعتها بيكون رده:
حاضر وأنا مستنييكي تحتاجي تحكيلي فتندهي عليا.

ولما هو بيتضايق ويرفض يتكلم بتقوله: مش عاوزة أبقي لحوحة بس أنا معاك دايمًا، واقفالك علي باب الكهف وقت ماتحب تتكلم أنا موجودة.

سهلوها عليهم وعلي نفسكو..الحياة مش ناقصة كلكعة.
مش باقي غير حنيتنا علي بعض، وقبولنا وتفهمنا. 👏👏
#اميرة_عابدين

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.