غير مصنف

دكتورة أميرة عابدبن تكتب… الحضن و هرمونات السعادة

قرأت اكتر من مقال قبل كدة على موقع psychology today وعرفت إن في حاجة اسمها hug therapy

– ان حضن واحد على الأقل لمدة ٣٠ ثانية يوميا ممكن يعالج الأعراض الجسمانية الناتجة عن حاجات كتير زي التوتر والغضب والشعور بالوحدة والاكتئاب.. وان الحضن عامة بيظبط ضغط الدم وبيرفع المناعة وبيساعد على إفراز هرمونات السعادة وبيحمي من خطر التعرض للاصابة بامراض القلب!

– الاطفال المحرومين من التواصل الجسدي واللمسات اللي زي الأحضان بيكونوا اكثر عرضة لضعف تطور قدارتهم وتأخر الوعي والإدراك وانعدام الثقة بالنفس

-في دكتور اسمه Paul Zak ومشهور باسم Dr.❤love
بيقول ان الانسان محتاج على الأقل ٨ احضان في اليوم علشان يقدر يعيش بسعادة ويبني علاقات سعيدة مع اللي حواليه..

وابحاث ودراسات كتير اهتمت بالموضوع دة واتكلمت عن فوايد اكتر بكتير..

فـ “الحضن” ثقافة محتاجين ننميها وننشرها في بيوتنا.. الأب والام يتعلموا يحضنوا ولادهم ويبثوا من خلالها مشاعر الثقة والامان والحنان في نفوسهم.. علشان ميطلعوش عندهم حرمان عاطفي ويمارسوا العنف كبديل للتعبير عن مشاعرهم..

الحضن كفيل يطمن إنسان مفزوع.. يجبر قلب مكسور.. يهدي روح غضبانة.. يشيل الكآبة وينور الضلمة اللي جوا..
حضن الأب لبنته مثلا أمان الدنيا ..
حضن الام لابنها فيه الحنان كله.. حضن الزوج لزوجته كفيل يحل أمور عِضال متتحلش في قعدة عرب حتى..
حتى الحضن البسيط بين الصحاب وقت الفرحة او وقت الحزن بيوصل المشاعر والمآزرة أسرع وابلغ من ميت كلمة…..هحكي لكم على موقف :

“من سنة كدة بنت بعتتلي تحكيلي عن قسوة مامتها معاها.. بتقولي ماما موظفة في منصب كبير وواخدة انها تؤمر وتتحكم.. وطبعا بابا مستحملش اسلوبها دة وطول الوقت كان بيزعق معاها وهي تعاند لحد ما انفصلوا.. هي شديدة جدا وكلامها لازم يتنفذ من غير نقاش.. حكمت عليا ادخل علمي واديني بعيد ثانوية عامة لتالت مرة وبردو مش حاسة بيا…و و و
وفضلت تحكي عن استياءها وانها نفسها في ام بدالها وأنها بدأت تكره حياتها بسبب الست دي..

فانا قولتلها ممكن لما تشوفي مامتك تحضنيها؟
طبعا استغربت شوية واتريقت شويتين.. وقالتلي احضن مين دي ممكن تضربني.. ازاي يعني.. دي عمرها ماحصلت!!
انا فهمتها اني بتكلم جد.. وأنها لازم تعمل كدة في كل فرصة ممكنة.. وتفضل تجرب حتى لو أمها زقتها في الاول أو قست عليها..!

البنت دي دخلت كلمتني تاني وبعتتلي رسايل جميلة جدا وصور كتير ليها هي ومامتها بيتفسحوا سوا.. وبيشتروا حاجات سوا وبيضحكوا زي احلى اتنين صحاب..!

وقالتلي انا حضنتها كتير يا أميرة .. كتير..
اعتقد لو بابا كان بيفكر يحضنها في كل خناقة ويطبطب عليها كان طلّع من جواها إنسانة اجمل بكتير.. يمكن ماما كانت محتاجة الحضن اكتر ميت مرة من احتياجي ليه!

(adsbygoogle = window.adsby || []).push({});
الوسوم

موضوعات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق